ប្រែសម្រួល៖ រតនា
រថភ្លើងដឹកអ្នកដំណើរនៅរដ្ឋ Pennsylvania,សហរដ្ឋអាមេរិក បានឆេះជាអណ្តាតភ្លើងយ៉ាងសន្ធោសន្ធៅ ដោយមានអណ្តាតភ្លើង និងផ្សែងខ្មៅក្រាស់ហុយចេញពីបង្អួចទូរថភ្លើង បណ្តាលឱ្យអ្នកដំណើររាប់រយនាក់រត់គេចខ្លួនដើម្បីសុវត្ថិភាព។
រថភ្លើងរបស់អាជ្ញាធរដឹកជញ្ជូនភាគអាគ្នេយ៍រដ្ឋ Pennsylvania (SEPTA) កំពុងធ្វើដំណើរឆ្លងកាត់ខោនធី Delaware នៅពេលឆេះនៅស្ថានីយ Crum Lynne ក្នុងក្រុង Ridley Park កាលពីយប់ថ្ងៃព្រហស្បតិ៍ ប្រហែលម៉ោង ៦ល្ងាច តាមការឱ្យដឹងពីមន្ត្រី។
អគ្គិភ័យបានផ្ទុះឡើងនៅទូទីមួយនៃរថភ្លើងដែលមានទូចំនួន៦ ដែលកំពុងធ្វើដំណើរពីទីក្រុង Philadelphia ទៅកាន់ Wilmington ដោយមានអ្នកដំណើរប្រមាណ ៣៥០នាក់។ អ្នកគ្រប់គ្រងរថភ្លើងបានធ្វើការយ៉ាងរហ័សដើម្បីជម្លៀសអ្នកដំណើរទាំងអស់ តាមការរាយការណ៍របស់ Fox 29។
រូបភាពដ៏គួរឱ្យតក់ស្លុតបង្ហាញពីអណ្តាតភ្លើងពណ៌ទឹកក្រូចភ្លឺ និងផ្សែងពណ៌ខ្មៅ និងប្រផេះក្រាស់ៗផ្ទុះចេញពីបង្អួចទូទីមួយ។
អ្នកដំណើរ Dnasia Buckner បានរំឭកថា មានក្លិនចម្លែកនៅលើរថភ្លើងក្រោយពេលចាប់ផ្តើមដំណើរបាន ១៥នាទី។
“យើងត្រូវក្រោកឡើង និងផ្លាស់ទៅទូផ្សេងទៀត ហើយបន្ទាប់មកយើងត្រូវក្រោកឡើង និងផ្លាស់ទីម្តងទៀត ហើយនោះជាពេលដែលខ្ញុំចាប់ផ្តើមឃើញផ្សែងចេញពីចំហៀងរថភ្លើង” Buckner បានប្រាប់ Fox 29។
នាងបាននិយាយថា ខណៈពេលពួកគេកំពុងផ្លាស់ទី មនុស្សចាប់ផ្តើមនិយាយថា “រថភ្លើងឆេះហើយ” ប៉ុន្តែអ្នកគ្រប់គ្រងរថភ្លើងមិនបាននិយាយទេ ហើយ “ទីបំផុត ពួកគេបានបើកទ្វារ ហើយយើងបានចុះចេញ”។
Buckner បានចែករំលែកថា វាហាក់ដូចជាត្រូវការពេលប្រហែល ១៥នាទី ដើម្បីជម្លៀសអ្នកដំណើររាប់រយនាក់ចេញពីរថភ្លើង។
អ្នកពន្លត់អគ្គិភ័យត្រូវបានហៅមកកាន់កន្លែងកើតហេតុដើម្បីពន្លត់អគ្គិភ័យ ហើយមិនមានរបួសត្រូវបានរាយការណ៍ឡើយ។
អគ្គិភ័យត្រូវបានគេជឿថាបានចាប់ផ្តើមនៅក្រោមទូទីមួយ លោក Busch បានប្រាប់ទៅកាន់ប្រព័ន្ធផ្សព្វផ្សាយ។
ការស៊ើបអង្កេតត្រូវបានចាប់ផ្តើមដើម្បីកំណត់ថាតើម៉ាស៊ីនរថភ្លើង ឬអ្វីមួយនៅលើផ្លូវដែកបានបង្កឱ្យមានអគ្គិភ័យ។
រថយន្តក្រុងជាច្រើនគ្រឿងបានមកដល់ដើម្បីទទួលយកអ្នកដំណើរដែលជាប់នៅទីនោះ និងដឹកជញ្ជូនពួកគេទៅគោលដៅរបស់ពួកគេ។
សេវាទៅកាន់ Wilmington ត្រូវបានផ្អាកក្នុងអំឡុងពេលកើតហេតុ ខណៈដែលមន្ត្រីសង្គ្រោះបន្ទាន់កំពុងប្រយុទ្ធប្រឆាំងនឹងអគ្គិភ័យ ហើយសេវា Amtrak នៅតាមបណ្តោយតំបន់ Northeast Corridor ក៏រងផលប៉ះពាល់ផងដែរ។ ទោះយ៉ាងណា សេវាទាំងនោះបានចាប់ផ្តើមដំណើរការឡើងវិញហើយ តាមការឱ្យដឹងពីលោក Busch និង Amtrak។
លោក Busch បានកោតសរសើរកិច្ចខិតខំប្រឹងប្រែងរបស់បុគ្គលិករថភ្លើង និងមន្ត្រីសង្គ្រោះបន្ទាន់ក្នុងការធានាថាអ្នកដំណើរទាំងអស់ចេញពីស្ថានភាពនេះដោយសុវត្ថិភាព៕
